Amdanom

Trawsnewidiwyd y Tabernacl yng nghanol y 1980au o fod yn gapel Wesleyaidd i fod yn ganolfan i’r celfyddydau perfformio. Ers hynny, mae MOMA Machynlleth (a adwaenid hyd at 2016 fel MOMA Cymru) wedi tyfu wrth ei ymyl ar ffurf saith gofod arddangos hardd.

Drwy gydol y flwyddyn, bydd MOMA Machynlleth yn cyflwyno arddangosfeydd sy’n rhoi sylw i gelfyddyd ac artistiaid modern a chyfoes o Gymru. Mae hyn yn cynnwys arddangosfeydd o waith yng Nghasgliad y Tabernacl a gweithiau ar fenthyg gan gasgliadau cyhoeddus a phreifat eraill. Ym mis Gorffennaf bydd eitemau dethol o Gystadleuaeth Gelf y Tabernacl ar ddangos ac ym mis Tachwedd cynhelir ein harddangosfa mawr ei bri o waith Artistiaid Ifainc Cymru.

Mae MOMA Machynlleth yn rhan o raglen ehangach o weithgareddau diwylliannol a gyflwynir yn y Tabernacl. Mae hyn yn cynnwys Gŵyl Machynlleth bob blwyddyn ynghyd â chyngherddau a sgyrsiau a hyrwyddir yn annibynnol. Mae’r Tabernacl yn dŷ derbyn i ddigwyddiadau gan gynnwys Gŵyl Gomedi Machynlleth a hefyd cynhelir amrywiaeth eang o ddosbarthiadau, gweithdai a gweithgareddau dysgu yma.

Mae’r Ganolfan hefyd ar gael i’w llogi ar hyd y flwyddyn.